LI  BIDDESI  DI  LA  GADDURA

Innanzi, cand'era sanu,

allegru gjràa lu mundu

abali mi gjru in tundu

in bacculu e pili canu.

C'aggja gjratu è siguru,

chi a Nucchisi paltisi.

Lurisi ancora 'idisi,

Aggju e Bultiggjata puru.

Senza cuntà Caragnani,

cun fiddolu d'intratura

e amichi di ciuintura.

chi vinn'ha malati e sani.

Si no è pal favvi pena

v'aggju a dì cun gran rispettu

socu 'ntratu illu traghettu

pa sbalcà in Madalena.

Vist'aggju puru a Caprera

e la costa palaesa

da tanta 'jenti cuntesa,

ch'è appuggjosa e sirena.

Si però lu mundu intreu

tuttu gjratu no aggju,

tengu celtu lu 'antaggju

di cunniscì lu locu meu.

Capotesta e Cannisgioni,

Vignola e L'isuledda,

c'ha una bedda spiaggjaredda

comu puru l'ha Lungoni.

Aggju 'istu a Tarranoa,

undi gjenti bona tenta

pa lu duimiliatrenta

di falla Pruìncia Noa.

E in più si dè ammittì

ch'emu la Costa Smeralda,

ma chiss'è pal gjenti calda

chi silla pò primmittì.

No è pal daccinni'anti,

la Gaddura è spiaggj d'oru,

comu l'ha Santu Diadoru

ch'è l'ultima di lianti.

Aemu alti lochi boni

come Telti e Alzachena

e Locusantu ch'è piena

di casteddi e muraglioni.

E Sant'Antoni e l'Aglientu

ancor'iddi illa Gaddura

facini bedda figura,

candu no vi tira 'entu.

E monti e vaddi ancora

risultanti disiciati,

e abbeddu appriziati

da gjenti nostra e di fora.

Chi bisognu in fundu in fundu

v'è d'iscicci a manca e a dresta,

candu gjenti pal fa festa

veni da tuttu lu mundu?

Dapoi d'aè gjratu

allonga da la carrera,

straccu di la me' andera

in Tempiu socu filmatu.

 Marcuccio Achenza

.