|
"...L'idea di
scrì chistu libbrittu m'è vinuta illu 1991, candu mi
piddesi un’influenzia mala chi mi duresi da la dì 18 di Natali
finz’a li primmi di maggju di l'annu ‘ nfattu.
La ciurrata
mill'ammentu bè' palch'era scriendi a un amicu e aìa postu, comu
si faci sempri, la datta a lu cumenciu di lu foddu. A un
celtu puntu m'ha presu un fritu folti, ma cussì folti, chi m'è
tuccatu spunì e culcammicci. Chista no stesi la culcata chi
paria chi no dia sanà più.
Illu primma
tempu chi rappresentàami, da lu '44 a lu '51, no essendivi nudda
di scrittu, palchì la “propaganda” cilla facia lu parracu in
gjesgia, nisciunu ci dicìa nudda. È proppiu comu dici lu dittu:
«Li parauli cilli polta lu 'entu». M'aeti a scusà siddu faeddu e
aggju a faiddà di li me' cumedi, ma pal rispundì a chissi chi
m'ani attaccatu, ni decu faiddà pal folza, palch’è proppiu pal
chissu ch’aggju scrittu chistu libbrittu.
Calche unu
po' aè autu ancora rasgioni, ma li più, pal contu meu, aìani
toltu, palchì candu aggju turratu a cumincià, aggju sigutu lu
modu di scrì di passoni di pruvettu, chi sapiani lu ch'erani
dicendi.
Vistu
lu tempu a dispusizioni aggju presu un quadernu (doaria di'
caltulari), pa rispundì a tutti. La primma cosa a fa è
stata comu intittolallu, ma, la 'iritai, no aggju stintatu
abbeddu. L'aggju a punì (comu aggju pinsatu): Ca no ha nudda di
fa pidda la gjatta a pittinà. E' un dittu chi li fala come
barretta a Bastianu!
Si no sta la
malatia è celtu chi no m'era postu a scrì chisti cosi. E
datu chi no vulia scrì né una grammattica (in gadduresu
punimu dui "t"), né un voccabolariu, chi no n'aggju la
capacitai, aggju a aggjungj': Curiositai di lu dialettu
gadduresu scritti pa ingannà lu tempu candu no si sa comu
passacci la ciurrata...o la nuttata. E la nuttata era più
mala a passà di la ciurrata, palchì candu mi piddàa la
frebba folti a di dì, m'abbattia e la notti la passàa sciutatu.
E l'ori di la notti stentani di più a passacci palchì no
s'intendi nisciun rumori, né di vetturi, né di televisioni, né
di lavatrici."
Marcuccio Achenza |
