I versi di Sebastiano Scano per M. A. Pirrigheddu

Cand'éra aggjanu, babbu, Andria di Scanu, fiddólu di lu puetta Jaseppa, s'incuntrési una 'olta a fiaccà lignamu in Lu Banconi, unu stazzu illa custaglia di Cincudenti, e istaggjìa in casa d'un cumpari di fidi, cumpari Currìa (Corrias): l'aìa battisgiatu una stédda, Gjusippina.

In chissu tempu, Gjusippina éra mannitta, e una dì passési illu traggjettu di lu riu undi v'aìa un paggju di femini laendi e si filmési a ciavanà. A un celtu puntu, la stédda disi: "Bè, abà mi n'andu ch'è taldu". Un'aggjanédda ch'éra laendi, una celta Pasca, chi dugna tantu punìa calchi muttu, disi a la stedda:

Abali è taldu e mi n'andu

chi l'óra è in irritiru.

Da lu mé pettu un suspiru

a nonnu tóiu li mandu.

La stédda si fési ripittì lu muttu e lu 'mparesi, e turrat'a casa lu disi a lu nonnu (a babbu, il padrino). Lu nonnu si la pusési innant'a li 'jinoccji e cantendi cantendi, impruisési chista canzona in sesta turrata:

1. D'esse suspiru sinzéru

nonnu méu no l'à cretta:

à dittu chi no n'accetta

e più no ni li mandà.

No n'accetta palchì sa

chi tu no séi fendi avvéru.

D'esse suspiru sinzéru

nonnu méu no l'à cretta.

2. Di no mandannilli più

a dì ti manda pal me.

No n'accetta chi sà bè

ch'avvéru no fai tu.

D'esse tuttu mannittù

lu timóri à dittu ch'à.

À dittu chi no n'accetta

e più no ni li mandà.

3. À dittu ch'à lu timóri

chi pal tradillu ti mói,

chi chissi suspiri

no só suspiri di córi.

A volti, in mez'a li fióri

trampósi spini vi stà.

À dittu chi no n'accetta

e più no ni li mandà.

4. vi stà spini trampósi

li più pugnenti e accutti,

in mez'a lil fióri tutti

e più di tutti li rósi.

Li tó spini 'ilinósi

cantu moltu n'arà(ni).

À dittu chi no n'accetta

e più no ni li mandà.

5. Li tó ispini pugnenti

sò fricci pal ch'a l'addiri,

cussì li tó suspiri

vi pó aé tradimenti.

E tandu siguramenti

ch'è più meddu a no fidà.

À dittu chi no n'accetta

e più no ni li mandà.

6. È più meddu a no fidassi,

t'avvelti e sapé ti faci;

proccura a lassallu in paci

si vói in paci a lassatti.

Lu chi no vói di fatti

mai a nisciunu no fà.

À dittu chi no n'accetta

e più no ni li mandà.

7. Lu chi di fatti no vói

no fallu mai a nisciunu:

pensa bè chi pó calcunu

distulbà li festi tói.

Palchì muttìu ti mói

cussì falza a suspirà?

À dittu chi no n'accetta

e più no ni li mandà.

8. Cussì falza suspiriggji

cun fingita passioni.

Nonnu t'avvelti e t'imponi

chi meddu cunsidariggji.

Si ispini siminiggji

ispini pói incuntrà.

À dittu chi no n'accetta

e più no ni li mandà.

9. Lu chi siminiggja spini

sempri è suggjettu a li gai,

chi ca' li spagli, lu sai

chi si li pó accudìni.

Sabbe' chi tutti l'ingrini

uguali no póni stà.

À dittu chi no n'accetta

e più no ni li mandà.

       (Andria di Scanu di Jaseppa)

Gjusippina fési lestra a imparà la canzona e candu 'idisi a Pasca vi la disi. Pasca si la piddési un pocu a lu malu e disi: "V'éra bisognu di fann'un filighestu...".

La storia cuntinuési cussì: Gjusippina Currìa, divintata manna si spusési cun ziu Tumméu Pirrigheddu. Li dui abbitesini in Tempiu e igninnarésini a Lillinu, e Lillinu e Angela igninnaresini a Maria Antonietta e alti stéddi. E a me piaci finì lu contu in biddesa cun Maria Antonietta.

(Sebastiano Scanu)